Sputnik/Wezareta Pêşmerge ya Kurdistanê ji bo Yekîneya 80emîn a girêdayî Partî Demokratî Kurdistan (PDK) û Yekîneya 70emîn a girêdayî Yekîtiya Niştîmanî Kurdistan (YNK) bike yekhêz projeyeke nû amade dike. Li gorî berpirsên Pêşmerge bi vê projeyê wê bingeheke bi hêz a yekbûna artêşa Pêşmerge were avêtin. Herwiha bi vê projeyê dê artêşa Pêşmerge di binê yek banî de bibe yek.

YAWER: GAVÊN GIRÎNG TÊNE AVÊTIN

Li gorî nûçeya Kurdistan24ê Sekreterê Giştî yê Wezareta Pêşmerge Cabbar Yawer di axaftina xwe de got: “Wezaretê bi tevlîbûn û keddayîna leşkerên Amerîka, Almanya û Îngîltere ku li Kurdistanê wezîfe dikin projeyeke yekbûna hêzên Pêşmerge amade kir. Bi vê projeyê wê gava yekemîn a bingeha yekbûna artêşa kurd were avêtin.”

CAFER MUSTAFA: PROJEYA VÊ CARÊ PIR SERKEFTÎ YE

Fermandarê Giştî yê Yekîneyên 70emîn Şêx Cafer Mustafa jî di axaftina xwe de got: “Ji bo yekbûna hêzên Pêşmerge astengiya herî mezin pirsgirêkên aborî ne.”Ev projeya ku vê carê hatiye çêkirin pir serkeftî ye. Ji bo avakirina artêşa Pêşmerge ku Kurdistana serbixwe biparêze hindik ma.”